Anthony Sir 你好，剛剛發現你的 Blog，連續追看一星期，發覺很有幫助！我好想買樓，去年聖誕開始睇樓，想等樓價跌，等極都等唔到，最近政府又再出招，看湯文亮的專欄及你的 Blog 都說樓價會調整，於是週末再去找附近的代理，看看有沒有業主減價，出招前有個單位睇過幾鍾意，開價 $350 萬，原本想傾到 $320 萬，點知業主不但冇減價，仲反價去到 $380 萬，點算好呢？單位是黃大仙區的 XX 大廈，3X 年樓齡，實用面積約 310 呎，追唔追得過？代理話一來冇乜盤，二來收緊咗按揭，更多人買唔起樓，細價樓叫價更高，真唔真？咁咪唔使買？
by 煩惱的 Herman
回覆讀者來信
反價又點？業主話幾多就俾幾多呀？佢開 1000 萬你又俾？
代理求成交取易不取難！你乜都唔識，昆你點都易過昆業主！業主反價 $380 萬？賣到先得架！照還 $320 萬囉！佢開價顛就得，你還價喪就唔得？
黃 大仙總算是市區，然而卻肯定不是一線區，你提到的單位，更遠離港鐵站，出入要轉乘小巴，二線區、二線段、單幢樓，個人認為不值這個價，這個價錢、質素，旁 邊的九龍灣、紅磡都買得到，走遠一點，九龍中亦有選擇！你說你聖誕已經開始睇樓，點會唔知？好明顯係淨係睇自己熟悉的地區，沒有到其他地區比較，唔知價， 實俾代理昆啦！
1% Anthony 對湯文亮博士的「細價樓爆煲論」非常認同！過去幾個星期在「經濟一週」網站專欄都有撰文解說，不贅。主要因為細價樓的「溢價」太高！以你提到的單位為例，這是旺角價、紅磡價！
點解三流物業賣到咁貴？
供應？政策？都是！不過最重要原因是...你唔識！你肯買！
好似當年賣新樓俾大陸人，明明市價 $1 萬，佢賣到 $1.3 萬，明昆架啦！鬼叫佢肯買咩？有錢賺，唔通唔賺呀？有食唔食，罪大惡極呀！
政府再推辣招，針對中細價樓，是要大家冷靜一吓！
網上很多人留言咒罵：「更難上車！」
筆者認為：「未嘗唔係好事！」
試想想，如果你俾個代理昆到，買咗嗰個 $380 萬的單位...
仲唔係接火棒？輸多過贏不特止，分分鐘估唔到價撻訂添！
網上又很多人咒罵：「買唔到樓焗租，加租加死啦！」
筆者認為：「你話加就加呀？租得起先得架！」
舉例，馬小玲原本想買美麗大廈 18 樓 C 座，點知加辣買唔起，業主唔肯減價又賣唔去，咁市場會出現咩情況？
。少咗一個買家，少咗一個賣盤；
。多咗一個租客，多咗一個租盤！
當個個都買唔起樓，係...佢哋係要租！但係...與此同時業主都有好多樓賣唔出，要放租！條數咪一鬼樣？！咪俾代理嚇親先得架！如果業主真係要加租，咁就咪鬼搬出去住啦，斷估你之前唔係瞓街，同屋企住？咪住多排先囉，屋企有鬼咩？！
近日很多反水貨示威的新聞...
從好的方面看，香港人追求的已經不是約粹賺錢！
從壞的方面看，香港無可避免會步入經濟下行週期！上車人士，仍然可以借 90%，只是供款入息比例調低 5%！
如果樓價調整 10% 甚至 20%，例如你提到的單位，叫價由 $380 萬調整至 $320 萬，甚至筆者認為合理的 $300 萬，條數咪一樣？！
政策、樓市、經濟各方面都配合了，樓價應該要調整！
只要買家，尤其是新手，冷靜下來，不要再破頂高追...
只要傳媒，不要再嘩眾取寵，日日攞破頂做頭條...
樓價就會回落！
★ 1% 廣告時間 - 地產投資實戰。免費講座！★
講者：法律強人 Jackie Sir
題目：辣招出台，有乜投資策略？
買樓、賣樓、出租...陷阱大揭秘！
租霸？僭建？凶宅？...隨時損失幾十萬，點可以唔識？
日期：5/3（四）7~10pm
地點：彌敦道 233 號佐敦薈商場 706 號鋪
留位：65330710-Cola、60980107-Icy（歡迎 Whatsapp）
About ME...
Facebook 群組：投資兵團、投資兵團遊樂團
第一桶金 Facebook：www.facebook.com/anthony.wealth第一桶金 Blog：http://anthony_chung_is.mysinablog.com
NEW！第一桶金信箱
如有關於物業的問題，歡迎到我的 Facebook，PM 給我！
1) 如果我識答，2) 如果不涉及太多課程內容，將盡量回覆。
免責聲明：本文純粹筆者個人意見，沒有促銷物業意圖。本人盡力確保資料正確，但不保證完全無誤，讀者須親身求證，參閱相關資料及售樓說明書，若有任何損失本人概不負責。
沒有留言:
張貼留言